ព្រះរាជពិធីច្រត់ព្រះនង្គ័ល ជាការប្រកាសប្រាប់ប្រជាកសិករនៅក្នុងប្រទេសថា រដូវធ្វើស្រែចម្ការមកដល់ហើយ។

នៅថ្ងៃទី៤ រោច ខែពិសាខ ជារៀងរាល់ឆ្នាំ នៅព្រះរាជាណាចក្រកម្ពុជា គឺតែងតែមានការប្រារព្ធព្រះរាជពិធីច្រត់​ព្រះនង្គ័ល ដែលជាប្រពៃណី​ទំនៀម​ទម្លាប់មួយ ដែលប្រារព្វឡើងដើម្បី ជាសារប្រកាសប្រាប់បណ្តាប្រជាកសិករខ្មែរ ឱ្យបានដឹងថាដល់ដូវកាលនៃការធ្វើស្រែវស្សា និងដំណាំ​ដាំដុះផ្សេងៗ ហើយ។

ព្រះ​រាជ​ពិធី​ច្រត់​ព្រះ​នង្គ័លនេះ គឺបាន​ចាក់​ឫស​យ៉ាង​ជ្រៅ​ក្នុង​ទំនៀម​ទម្លាប់​ខ្មែរហើយ បើយោងតាមប្រារព្វជារៀងរាល់ឆ្នាំ និងផ្អែកតាម​ប្រវត្តិសាស្ត្រ និង​ចម្លាក់​នានាដែលមាន។ បើទោះបីជាមិន​មាន​ឯកសារ​ណា​បញ្ជាក់​ច្បាស់​ពី​ប្រវត្តិ​ នៃ​ព្រះ​រាជពិធី​ច្រត់​ព្រះ​នង្គ័ល​នេះយ៉ាងណាក្តី ក៏​មានប្រភព​មួយ​ចំនួន​បានបង្ហាញ​ថា ព្រះរាជពិធីនេះគឺប្រារព្វឡើងតាម​លក្ខណៈ​ព្រហ្មញ្ញ​សាសនា​ផង និងពុទ្ធសាសនា​​ផង។

ចូល​មក​ដល់​សម័យ​សង្គមរាស្ត្រនិយម ពិធី​មួយ​នេះ​បាន​ប្រារព្ធ​ឡើង​ជា​ប្រចាំ ប៉ុន្តែ​ត្រូវ​អាក់​ខាន​ទៅ​វិញ នៅ​សម័យ​សាធារណរដ្ឋ​ខ្មែរ រហូតដល់ព្រះបាទសម្តេចព្រះ នរោត្តម សីហនុ (ព្រះបរមរតនកោដ្ឋ) ព្រះអង្គបានរៀបចំ​ព្រះរាជ​ពិធី​ច្រត់​ព្រះ​នង្គ័ល​នេះ​ឱ្យ​មាន​វត្តមាន​ជា​ថ្មី​គឺ នៅ​ឆ្នាំ​១៩៩៤ និង​បន្ត​រហូត​មក​ដល់​សព្វ​ថ្ងៃ​នេះ។

ប្រជាកសិករខ្មែរនៅទូទាំងប្រទេសកម្ពុជា បានចាត់ទុកព្រះរាជពិធីច្រត់ព្រះនង្គ័លនេះថាជាការពញ្ញាក់សា្មរតីពួកគេ ឱ្យត្រៀម ស្រូវពូជ ​និង​គ្រាប់ពូជ​ដំណាំផ្សេងៗ គោ​ក្របី រទេះ ឧបករណ៍សម្រាប់ធ្វើស្រែចំការ កម្លាំងពលកម្ម កូនចៅ អ្នកភូមិផងរបងជាមួយសម្រាប់​ប្រវ៉ាស់ដៃគ្នា ក្នុងការធ្វើស្រែចម្ការ ព្រោះថាវស្សារដូវបានឈានចូលមកដល់ហើយ។

ទោះបីជាសព្វថ្ងៃវិទ្យាសាស្រ្តមានភាពជឿនលឿន ហើយប្រទេសកម្ពុជា ក៏ជឿនលឿន តាមគោលការណ៍ទាក់ទាញ និងលើក​ទឹកចិត្តវិនិយោគិនបរទេសមកបណ្តាក់ទុន បង្កើតជា រោងចក្រ សហគ្រាស ទាំងតូច មធ្យម គ្រប់ប្រភេទ ក៏ពិតមែន ប៉ុន្តែវិស័យ​កសិកម្មនៅតែ​ជាវិស័យអាទិភាពមួយ ក្នុងការជួយជំរុញកំណើនសេដ្ឋកិច្ចជាតិដដែល។

នៅក្នុង​រឿង​រាមកេរ្តិ៍ នៅ​ក្នុង​ព្រហ្មញ្ញ​សាសនា ត្រង់ឈុត​មួយ​ដែល​និយាយ​ពី​ព្រះ​រាជពិធី​ច្រត់​ព្រះ​នង្គ័ល គឺ​ត្រង់​ព្រះ​រាម​ទៅ​ច្រត់​ព្រះនង្គ័ល​រក​នាង​សេដា ដែល​គេ​ផ្ញើ​នឹង​ព្រះធរណី​នៅ​ក្នុង​ដី។ ចំណែក​នៅ​ក្នុង​ព្រះ​ពុទ្ធសាសនា​វិញ គឺ​ត្រង់​កន្លែង​មួយ ព្រះពុទ្ធអង្គ​ប្រសូត​មក មាន​ពិធី​ច្រត់​នង្គ័ល គេ​យក​ព្រះ​អង្គ​ទៅ​ចូល​រួម​ដែរ ហើយ​ពេល​នោះ ព្រះ​អង្គ​ពិចារណា​រឿង​គោ​ដែល​ហត់​នឿយ​ក្នុង​ការ​ភ្ជួរ​ស្រែ។

តាមការកត់ត្រាកន្លងមក បានឲ្យដឹងថា អត្ថន័យពិតប្រាកដក្នុងព្រះរាជពិធីច្រត់ព្រះន័ង្គលគឺមាន ០៤ ចំណុចសំខាន់ៗ ដូចខាងក្រោមង៖

ទីមួយ៖ ប្រាប់​កសិករ​ថា​ ដល់​រដូវ​ធ្វើ​ស្រែ​ហើយ ។

ទីពីរ៖ ផ្សង​ការ​បរិភោគ​របស់​គោ​ឧសភរាជ​ និង​ការ​បួង​សួង​សុំ​ទឹក​ភ្លៀង​ និង​ទិន្នផល​ដំណាំ ។

ទីបី៖ ការ​ដឹង​គុណ​ សំដៅ​ដល់​ការ​ដឹង​គុណ​របស់​ប្រជានុរាស្ត្រ​ចំពោះ​អាទិទេព​ ក៏​ដូចជា​មេឃ​ ដែល​បាន​បង្អុរ​ភ្លៀង និងទី ។ និង

ទីបួន៖ គេ​ជឿ​ជាក់​ថា​ ស្ដេច​មេឃ គឺ​ជា​មនុស្ស​ដែល​មាន​ឥទ្ធិពល​លើ​ការ​គ្រប់គ្រង​ ឬ​បញ្ជា​ធរណី​ និង​មេឃ​បាន ​។

សូមអរគុណ!

This summary is for informational purposes only and does not constitute legal advice. It is not comprehensive, and readers should seek professional legal consultation for their specific circumstances. SOPHEAPCAMBOLAW retains full ownership of this content. Unauthorized reproduction, distribution, or use of any part of this article without prior written approval is strictly prohibited.

សព្វទានំ ធម្មទានំ ជិនាតិ
Sharing knowledge is the most worthwhile endeavor of all.

-ព្រះពុទ្ធ-